بداية اسمحولى أن أهدى هذا الموضوع إلى كل زوجة وكل فتاة مقبلة على الزواج كى تتعلم فن "التنكيد" على زوجها وكيف تنغص عليه حياته وتجعله يكرهها ويكره نفسه ويكره الدنيا بأسرها.
لذا , ما عليك أختى العزيزة والغالية سوى اتباع بعضا من الخطوات البسيطة كى تحققى مرادك ومنها :
1 كونى دائما عابسة الوجه واجعلى وجهك مصمتا لا تخرج منه أية إبتسامة ولو كانت عابرة طالما زوجك موجودا أمامك ولم يغادر البيت.
2 لا تنسى أبدا أن تستقبليه على باب البيت وهو عائد من عمله المرهق بالصراخ والشكوى من أى شئ يخطر ببالك (جيران , أولاد , أجهزة معطلة , ......... , أى شئ المهم تكون حاجة تعكنن عليه وخلاص)
3 كونى دائما مستعدة بقائمتك الطويلة والمميزة بالطلبات والأشياء التى يجب أن تشتريها ويجب عليه توفير المال اللازم لذلك بأى طريقة حتى ولو اضطر لبيع ملابسه كى يرضيكى .
4 كونى دائمة بمثابة آلة التنبيه المستمرة له كى تذكريه بالفواتير المطلوب سدادها (كهرباء , مياه , غاز , تليفون , ................, المهم تلاقى أى فاتورة والسلام)
5 لا تنسى أن تستقبليه دائما بعطورك النفاذة والمميزة لك كربة منزل (يعنى ريحة بصل , توم , تقلية , .......... ) المهم حاجة كدة تخليه أول ما يفتح باب البيت يقفله بسرعة ويرجع تانى برة البيت
6 يا سلام عليكى بقى لو تخليه جاى هلكان من شغله وخناقاته وتعبه هناك وتروحى كاتمة على نفسه وتجبريه ينزل معاكى فى فسحة برة البيت أو تروحوا مع بعض لأى مكان المهم إنه ما ياخدش و لو 5 دقايق راحة فى البيت
7 لو كان عندك طفل رضيع , يبقى ده عز الطلب علشان دايما لما يكون الزوج مرتاح شوية على السرير جوه غرفته , تروحى بسرعة برضيعك جوة الغرفة تغيريله , تلاعبيه , تقرصيه علشان يصرخ , المهم أى حاجة تخلى الطفل يتواطأ معاكى فى ازعاج الزوج وخلاص
8 إوعى تنسى كل شوية ترميله كلمتين مستفزين يخلوه يتعصب ويتنطط وأنت طبعا تكونى فى قمة البرود والهدوء
9 خليكى دايما مصدر إزعاج ليه وهو بيتفرج على التليفزيون و خصوصا لو كان رياضى وبيتابع ماتش مهم للفريق اللى بيشجعه , يعنى ممكن تقفى قدامه بحجة تنضيف البيت , ممكن تمسكى الريموت وتغيرى القناة بحجة إنك عايزة تتفرجى على المسلسل , ممكن برضه تظهرى الفرحة الغامرة أو السعادة الكبيرة لو الفريق اللى بيشجعه اتغلب أو دخل فيه جول
10 اشكيله دايما من أهله وخصوصا أمه واخواته البنات وإوعى تجيبى سيرتهم على لسانك إلا بشكوى أو مشكلة
11 ودى أخر نقطة جايبهالكم بس أهمهم وأخطرهم وأكثرهم فعالية , إنك تسلطى عليه أمك (حماته) وهى تتكفل بكل اللى فات ويمكن هى تبتكر طرق أقوى وأسرع للتنكيد عليه.
* وبعد أن انتهيت من سرد تلك النقاط , أدعوكن أخواتى العزيزات وأرجوكن بشدة أن تتجنبن هذه النقاط وتقمن بعمل عكسها تماما , وحافظن قدر المستطاع على بيوتكن عن طريق الحفاظ على أزواجكن بتوفير كل ما هو ملائم ومناسب لعمل حياة زوجية هادئة ومستقرة.
